اكرم الكراني:رحلتي من جليم ومحطة الرمل .. الي (يا فلسطين)!!
دخلت امتحان الرسم الهندسي في كلية الهندسة بالجيتار..
نسيت المسطرة حرف التي والتابل..
نفسي اتعاون فنيا مع ويجز او مسلم او امير عيد
حاوره الاعلامي/يوسف فريد
مساء الفل علي جمهورنا الجميل بعد غياب طويل…زي معودناكم دايما بابنا مفتوح لكل الموهوبين والمتميزين في مختلف المجالات…وانهارده وبعد غياب رجعنالكم من تاني…ومعانا ومنورنا الصحفي والملحن..الإستاذ أكرم الكراني
أهلا بيك يا إستاذ أكرم منورنا
أهلا بيك يا يوسف سعيد بظهوري معاك انهارده
1_ممكن تعرفنا بنفسك؟
اسمي اكرم الكراني خريج كلية الاعلام جامعة القاهرة قسم صحافة دفعة ٢٠٠٥ ..صحفي حر وبلعب جيتار من ايام جامعة الاسكتدرية..دخلتها قبل اعلام وقعدت فيها سنة ..اول حاجة عملتها لما نزلت اسكندرية اشتريت جيتار من شارع صفية زغلول..ولفيت بيه اسكندرية كلها وفي كل محطات الترام من بحري لمحرم بيه
ومن سيدي جابر لجليم..وكانت قعدتي كلها في مطعم انا ميشو في الابراهيمية ..وبعدها نتمشي في شارع الجيتار .
زمايلي كلهم كانوا فاكريني ابن عم الفنان مصطفي قمر لان كان في شبه كبير جدا بيني وبينه وانا صغير..وكانو بيسموني اكرم قمر..
2_إزاي بدأت رحلتك مع مجال الموسيقي؟
بدات من نادي الجامعة وحفلات الجامعة في الاسكندرية ومن كتر ارتباطي بالجيتار رحت امتحان الهندسة الوصفية والرسم الهندسي من غير المسطرة (حرف تي)..والمراقب قاللي هتسقط كدة يا بشمهندس.قلتله انا مش بشمهندس انا عندي حفلة بعد الامتحان..قاللي طب خلص الامتحان وروح كنت جيب التي معاك..
وانا طبعا رحت بالجيتار ونسيت اجيب معايا المسطرة حرف تي والتابل الترابيزة بتاعة الرسم الهندسي..
لما حولت كلية الاعلام احتضنتي اسرة النيل وغنيت في حفلات الجامعة برضو ختام النشاط وبداية النشاط..
في الفترة دي ولغاية دلوقتي بشتغل صحفي حر
في التسعينيات اشتغلت في مجلة كاريكاتير وحريتي والكورة والملاعب والفن والحياة المصرية والانباء الدولية والصناعة والاقتصاد ووشوشة والريشة …
ولما انتشر الاعلام الاليكتروني دخلت فيه واسست موقع اسمه جيل يناير اشتغل شوية بس هو واقف دلوقتي مؤقتا
3_إيه هي أشهر ألحانك؟
اشهر اغاني بتاعتي مكرونة بالصلصة /والنبي يا مراكبي /ليه يا طريق/سكة الاحباب/
وحاليا داخل مشروع اغنية عبارة عن قصة واقعية فلسفية رمزية ترمز لحياة شاب واتنين اصحاب فيها حزن وشجن ولايت رومانس..قصة كدة جميلة جدا اسمها (العرافة)
في اواخر السنة اللي فاتت عملت اغنية(يا فلسطين)..كلماتي والحاني وغناء طبعا
وفي شهر اتنين اللي فات عملت اغنية رومانسية اسمها(الوحدة)
بشتغل برضو في مجال افلام الديجيتال القصيرة ولي فيلمين من انتاجي (اول محاولة) و(اول حب)..وكان في مشروع ثالث اسمه (العملية بدر) المفروض كان يتنفذ اخر الشهر اللي فات بس في مشاكل تتعلق ببطلة الفيلم ومشاكل تانية في الانتاج..
بقدم فقرة كل يوم سبت في برنامج اسرار الحياة مع الاعلامية هند شاهين في قناة الصحة والجمال..خمس دقايق بعزف وبغني علي الجيتار..
ولسة مخلص لقاء اذاعي علي جزءين في برناج زوم علي الفن مع الاعلامي الليبي سالم اعنيبة راديو صوت النيل ولقاء تلفزيوني في برنامج الحياة اليوم الخليجية..
4_مين أكتر فنان نفسك تتعاون معاه في عمل فني؟
نفسي اتعاون مع الفنان ويجز او امير عيد مسلم فريق كايروكي او وسط البلد لان اغانيه فلسفية وتستخدم لغة الرمز وهي قريبة من اداءي حاليا
5_من وجهة نظرك شايف إنتشار موسيقي المهرجانات دمر الموسيقي في مصر أم ليس له علاقة؟
اغاني المهرجانات ظاهرة فرضت نفسها علي الذوق العام حاليا وممكن تكون موجة وتنتهي زيها زي اغاني الشبابية في فترة التسعينيات اللي كانت تواجهها موجة اغاني كلاسيكية في الوقت ده كان في صراع دايم ومنافسة فنية مستترة بين حميد الشاعري ورفاقه..
وبين نجوم الفن الجميل هاني شاكر مدحت صالح محمد الحلو علي الحجار طارق فؤاد محمد ثروت
غير كمان موضة الاغاني الخليجية متمثلة في كاظم الساهرو محمد عبده وعبد الله الرويشد…
دلوقتي اللي بينافس المهرجانات اغاني امير عيد وويجز ومسلم وكاريوكي ووسط البلد
ودي موجة وهتنتهي ودي موجة وهتنتهي..
الفن الجيد مش لازم يربح اموال .
الفن للفن فقط اهم بكثير من النجاح التجاري اللي قايم علي التفاهة..ويا جماعة والله مش كل حاجة الفلوس..
ومش كل النجاح فلوس..
قيمة الفن في الرسالة وفي احساس الناس بيه وازاي توصل الرسالة دي للناس باحترام وادب ولغة جيدة فيها ذوق ورقي
6_تحب تنصح أي ملحن في بداية مسيرته بإيه؟
احب انصح اي ملحن اقولله اولا اسمع اغاني كتير جدا ومزيكا كتيرة جدا جدا جدا من كل الالوان. حتي لو مش مناسبة لذوقك
وبعدها كون شخصيتك الموسيقية وكون لون خاص بيك وتركيبة ليك لوحدك من خلال اختزالك وتلخيصك لكل الالوان اللي سمعتها…
اول خطوة لازم تكون سميع
زي جمهورك اللي هيتكون بعد كدة
اسمع كتير..اسمع كتير..اسمع كتير..
وانا بشكرك كتير يا إستاذ أكرم علي وجودك معانا نورتنا انهارده واتشرفنا بوجودك
الشرف ليا يا إستاذ يوسف وبشكر حضرتك علي حسن الإستضافة وأتمني اكون كنت ضيف خفيف وقدرت أوصل رسالتي
كان معانا ومنورنا الملحن والصحفي الإستاذ أكرم القراني وإلي اللقاء في حوارات صحفية قادمة مع نماذج مميزة في عالم الصحافة. والفن .